Sunday, May 20, 2012

لية مقاطع أنتخابات الرئاسة ؟

دى أول تدوينة أكتبها فى حياتى وبعد تفكير كتير فى موضوع أول تدوينة قررت أنى أخليها تحليل عن مقاطعتى لأنتخابات الرئاسة فى مصر 2012 , المهم مش هنرشح مين أو ندعم مين المهم دلوقتى العقد اللى بينى وبين الرئيس القادم .
ازاى انا اروح علشان اشترى شقة او محل وادفع لصاحب المكان فلوس كتير ومعملش عقد بينى وبينو يضمن حقى وحقو ولو حصل كدة فعلا هيجى صاحب المكان يروح مقدم ضدى بلاغ ويجى البوليس يمشينى من المكان هصرخ وهقول حقى هيقولى فين العقد ؟!! .
المهم دلوقتى مش مين هيبقى الرئيس المهم دلوقتى الدستور (عقد) اللى بينى وبين الرئيس القادم اللى يحفظ حقى , ازاى اروح انتخب رئيس وانا معرفش صلاحياتو اية؟!
مش يمكن عندو صلاحيات ألهية ؟! مش يمكن معندوش صلاحيات خالص ؟!
ياعنى اية المؤسسة العسكرية فوق القانون ومحدش يجى جنبها ؟!
المؤسسة العسكرية زيها زى اى مؤسسة تابعة لدولة مصر , اللى بيحصل دلوقتى ان المؤسسة العسكرية تعتبر نفسها شىء ومصر شىء أخر بمعنى أخر دولة داخل دولة .
الجديد فى الموضوع دلوقتى أن العسكر عايز يصدر اعلان دستور مكمل موضح فية صلاحيات الرئيس القادم , الاعلان الدستورى بيقول :-
(حق مجلس الشعب فى تشكيل الحكومة، باستثناء «الوزارات السيادية»، كما يحق لمجلس الشعب سحب الثقة من الحكومة، بينما يحق لرئيس الجمهورية حلّ مجلس الشعب) .

ياعنى مجلس الشعب من حقو يجيب اى وزيرولكن الوزارت السيادية اللى هم ( الداخلية و الدفاع و الخارجية و العدل والتعليم و التعليم العالى ) بيجبها الرئيس , كما يحق للمجلس سحب الثقة من الحكومة اللى معظمها شكلها الرئيس ؟!! طيب ازاى ؟! 
كمان من حق الرئيس سحب الثقة من الحكومة !! ادينى عقلك بقى ازاى يعطى لمجلس الشعب الحق فى تشكيل حكومة وسحب ثقة منها وكمان أعطى رئيس جمهورية حل البرلمان ؟!! 
(تناقش بنود ميزانية الجيش من خلال لجنة الدفاع والأمن القومى بمجلس الشعب، على أن تكون المناقشه سرية وغير معلنة، ويتم إدراج موازنة القوات المسلحة رقماً واحداً فى موازنة الدولة )
ياعنى اية ميزانية الجيش غير معلنة ؟! ياعنى تجيلو فلوس ومعرفش هو بيصرفها فين !! لا وكمان اية ميزانية الجيش رقم واحد فى موازنة الدولة ياعنى مش مهم اى ميزانية تانية المهم ميزانية الجيش اللى معرفش بتروح فين وبتتصرف ازاى ياعنى دولة عايشة فى سلام من اكتر من 30 سنة ولسة الجيش فيها رقم واحد !
( ورئيس الجمهورية هو القائد الأعلى للقوات المسلحة، ووزير الدفاع هو القائد العام للقوات المسلحة، ويعلن رئيس الجمهورية الحرب بعد موافقة المجلس الأعلى للقوات المسلحة ومجلس الشعب)
اعتقد إن البند دة واضح جداً والبند دة بردو بيقول مين اللى هيبقى الرئيس , وأعتقد ان البند دة لوحدو سبب كافى إن اقاطع الأنتخابات (انتخابات المجلس العسكرى)
 

0 comments:

Post a Comment